Zëdhënësi i Lëvizjes Vetëvendosje (LVV), Arlind Manxhuka, pas djegies së dy zyrave të Institutit të Mjekësisë Ligjore në Prishtinë, ka shkruar se nuk mundet askush t’i dëmtojë më provat mbi rastin e Astrit Deharit sepse mbi to sipas tij, janë bërë tashmë ekspertiza e superekspertiza.

Përmes një postimi në Facebook., Manxhuka ka theksuar se askush nuk duhet të shqetësohet mbi integritetin e tyre, duke shtuar se i shqetëson vetëm padrejtësia dhe moszbardhja e rastit të Deharit.

Tutje, ai ka thënë se “rasti i Astrit Deharit është me të vërtetë rast që ka prekur gjithë shoqërinë dhe çkado që ndodh njerëzit me të drejtë hedhin dyshime”.

“Sa i përket rastit “Dehari” nuk mundet askush t’i dëmtojë më ato prova sepse mbi to janë bërë tashmë ekspertiza e superekspertiza. Kështu që për sigurinë e tyre nuk duhet askush të shqetësohet. Të shqetësuar jemi vetëm mbi padrejtësinë, moszbardhjen ende të atij rasti. Rasti i Astrit Deharit është me të vërtetë rast që ka prekur gjithë shoqërinë dhe çkado që ndodh njerëzit me të drejtë hedhin dyshime, por provat dhe e vërteta janë të pazhbëshme tashmë. Është koha vetëm për drejtësi”, u shpreh Manxhuka./Arbresh.info

Lexo edhe:

Dy zyra përfshihen nga zjarri në IML, policia: Nuk ka të lënduar